/_nw/0/32415328.jpg Энэ жилийн ДАШТ-д түрүүлэх хамгийн боломжтой багаар нэрлэгдэж байгаа Европын аварга Испаний шигшээ нээлтийн тоглолтоо Швейцарийн багтай хийх гэж байна. Анхныхаа аварга цолыг авахаар ирсэн Испаничууд сүүлийн 48 тоглолтоосоо ердөө ганцхан хожигдол амсаад байгаа. Мөн сонгон шалгаруулалтын 10 тоглолтондоо бүгдэд нь ялалт аван, гайхалтай тоглолтоо үзүүлсээр байгаа. Висенте Дель Боскегийн багт Иньеста, Шави, Фабрегас зэрэг төвийн шугамын мастерууд байгаагаас гадна Торрес, Вилья нар довтолгоонд, Пике, Пуиоль нар хамгаалалтанд нь зогсож байна. Швейцарьчууд Испанийг нэг ч хожиж үзээгүй. 18 удаа тоглохдоо 15 удаа хожигдоод байгаа. 2006 оны ДАШТ-д нэг ч гоол алдаагүй ч хасагдаж байсан тэд хамгаалалтандаа найдаж байгаа нь тодорхой. Дээрээс нь тэднийг нэрт дасгалжуулагч Оттмар Хитцфельд багаа удирдаж байгаа. Багийн ахлагч Александр Фрай гэмтэлтэй байгаа нь тэдний асуудал байгаа бол Испаниас Иньеста, Торрес нар гэмтлээсээ дөнгөж ирээд байгаа учраас гараанд гарахгүй бололтой.
Испаний онцлох тоглогч: Давид Вилья
Евро 2008-ын мэргэн бууч тэрээр сонгон шалгаруулалтанд 7 гоол оруулсан. Энэ жилийн мэргэн буучийн шагналд өрсөлдөх учиртай түүний довтолгооны хослол Торрес гэмтлээсээ дөнгөж ирээд байгаа учраас нуруун дээрээ их ачаа үүрэх шаардлагатай болж байна.
Швейцарийн онцлох тоглогч: Блайсе Нкуфо
Конгод төрсөн 35 настай түүнийг сонгон шалгаруулалтанд багийнхаа мэргэн бууч болсон нь гайхалтай тохиолдол байлаа. Твентегийн хамт Голландын лигт түрүүлсэн тэрээр Фрайгийн эзгүйд довтолгооны шугамд гол тоглогч нь байх болно.
Испаничууд энэ ДАШТ-д түрүүлэх хэмжээний тоглолт үзүүлж чадах болов уу? Туршлагатай болсон Швейцарийн залуус энэ жил өнгөрсөн тэмцээнүүд шигээ эрчтэй тоглолт харуулж чадах болов уу? Хэдхэн цагийн дараа тодорхой болно. Таны бодлоор дүн хэд хэд байх бол?