Хөлбөмбөгийн ДАШТ-ийг Америкт амьдардаг монголчууд маань хэрхэн яаж үзэх талаар бяцхан зөвлөгөө өгье.

ӨАБНУ-д 2010 оны зургадугаар сарын 11-ээс долдугаар сарын 11-ийг хүртэл үргэлжлэх хөлбөмбөгийн ДАШТ-ийг АНУ-ын спортын төрөлжсөн суваг болох ESPN шууд дамжуулах эрхийг авсан билээ. Тэгэхээр нээлтийн тоглолтоос эхлээд аваргын цом, алтан медалийн төлөөх финалын тоглолт хүртэлх бүх 64 тоглолтыг Та бид шууд (live ) үзэх боломжтой.

Мэдээж хүний газар ажиллаж буй бидэнд Монголдоо байдаг шиг ажил дээрээ юм уу, ажлаа таслаад, эсвэл ээлжийн амралтаа аваад үзэх боломж бараг гарахгүй , олдохгүй, болохгүй биз. Гэхдээ ажил, амралт, нойроо сайн зохицуулж чадвал бүгдийг нь биш юм аа гэхэд ихэнхийг нь шууд үзчихэж болно.

Тойргийн тоглолтууд дуусахаас өмнө өдөрт ихэвчлэн гурван тоглолт болох бөгөөд эхнийх нь Америкийн Баруун бүсийн буюу Pacific time цагаар 04.30 ам -д, хоёр дахь тоглолт 07.00 ам –д, гурав дахь тоглолт 11.30 ам-д тус тус эхлэх юм. Эртхэн унтаад, өглөө эртхэн босоод дээр дурьдсан цагуудад сувгаа ESPN дээр тавихад ихэнх хүмүүс ажилдаа гарахаас өмнө хоёр тоглолт үзчихэж болох юм. Харин оройгоор пицца зөөдөг хүмүүс бол гурван тоглолтоо гурвууланг нь ч үзэх боломж байна. Өөрсдийн дур, сонирхолоос бас шалтгаална л даа.

Үнэхээр ажил төрөл нь хатуу дэг жаягтай, нарийн цагийн хуваарьтай хүмүүс бол өдөр нь утсаа авахгүй , и-мэйл ээ шалгахгүй, text message -аа үзэхгүй байж байгаад орой нь гарах давталтуудыг үзэхэд бас л live үзэхээс ялгаа нь юу билээ. Оройн 6.00 рм , мөн 9 рм цагуудаас Galavision, Telefutura, ESPN2 гэх мэт маш олон суваг давталтыг гаргах юм билээ. Хэрэв Та кабельгүй бол internet-ээр өөрийн PC дээрээ ч үзэж бас болно. ESPN3.com сайтаар мөн л live болон бичлэгээр үзэж болно. Бас ямар ч төлбөргүй шүү. Хэрэв орос тайлбартай үзье гэвэл www.etvnet.ca руу ороод үзээрэй, бичлэг, тайлбар нь их сайн байдаг юм.

За тэгээд маргааш өглөөний мандах нарнаас эхлээд хөлбөмбөгөө үзээд байж дээ, хэдүүлээ. Та бүхэнд эхний хэдэн өдрийн тоглолтын цагийг сонирхуулья.

06.11 Баасан гаригт 05.00 ам Хөлбөмбөгийн ДАШТ-ий нээлтийн ёслолын ажиллагаа 07.00 ам Өмнөд Африк- Мексик 11.30 ам Уругвай –Франц

06.12 Бямба гаригт 04.30 ам БНСУ-Грек 07.00 ам Аргентин- Нигери 11.30 ам Англи -АНУ

06.13 Ням гаригт 04.30 ам Алжир-Словен 07.00 ам Серб-Гана 11.30 ам Герман-Австрали

06.14 Даваа гаригт 04.30 ам Холланд-Дани 07.00 ам Япон-Камерун 11.30 ам Итали-Парагвай